Velkommen

Så koseleg at du tar turen innom sida mi. Hyggeleg om du legg att eit lite spor, så veit eg at DU har vore innom.

Ha ein fantastisk dag vidare og velkomen tilbake!




randi@kuloy.net

Plutseleg vart eg mamma

torsdag 8.september 2011

Då er det verkeleg lenge sidan forrige innlegg her hjå meg, og masse har skjedd sidan sist. Innspurten på svangerskapet vart ikkje heilt som planlagt. Eg fekk nyta tre rolege dagar med permisjon før eg flata heilt ut. Det viste seg så at eg hadde fått ein hissig form for svangerskapsforgifting, med hellp-syndrom.

Dette gjorde at fødselen måtte settast i gang før tida og ja, utan å gå i detalj så vart det ikkje heilt den fødselsopplevinga eg hadde sett for meg. Men to veker før termin kom altså den vakraste guten som finst til verda.

 

Lille Jakob; 3460 gram, 53 cm.

 

Og når eg endeleg fekk denne herlege goklumpen her i armane så var alt anna eg hadde vore igjennom utan betyding. Plutseleg var eg vorten mamma. Ei fantastisk oppleving!

 

 

Barselopphaldet vart som ein følgje av alt noko lengre enn ”normalt”, men no er vi endeleg komen heim og er godt i gang med å finne ut av rutinar og bli kjent med den nye sjefen i huset ;-)

 

 

No skal vi fortsetta å kosa oss her heima vi tre. Min eigen vesle kjernefamilie.

 

 

Så kjem eg nok litt meir aktivt tilbake her i bloggeland sånn etter kvart…

 

Lagt inn av Randi Kl. 18:47 | 15 kommentarar
Tema: | Kategori: Ymse

Rundvask og vinnarlykke

søndag 31.juli 2011

Kvardagen er tilbake på alle måtar. Ferien er over og eg er tilbake i arbeid att.

Er nøgd med at eg framleis er så oppegåande at eg kan gå i arbeid. Kjenner jo naturlegvis at ting begynner å bli tyngre, ting tar tid og eg er nok ikkje like effektiv som eg er til vanleg, men… godt å klare å gjera noko anna enn å berre sitte å vente…

Og denne helga har vore vaskehelg. Fann ut det var på sin plass med ein liten rundvask før prinsen kjem.  Og med det fine været vi har hatt var det jo perfekt å berre få hiva alt laust ut på terrassen og setta i gang nedvasking inne.

 

 

Men sjølv er eg såpass lite bøyeleg og tøyeleg for tida at det vart nok Mannen som fekk ta største jobben… Medan eg tørka litt støv av pynteting her og der og gjorde litt sånn diverse småarbeid i passande arbeidshøgde, så var det han som klatra høgt og lavt og fekk vekk støv langs lister og i kroker.

 

 

Og når teppa skulle bankast og vi kom på at vi framleis ikkje har noko teppebankar, ja då fekk han vera kreativ ;-)

Så glad for at Mannen tok over styringa og jobben med å få huset i orden her, hadde nok ikkje vorte gjennomført utan han…

 

 

Og apropos vasking, her er Mannen nok ein gang i aksjon tidlegare i sommar, vasking av mi gamle barneseng :-D Men den skal de nok få sjå meir av seinare.

 

Og så har eg vore så heldig å vunne give away inne hjå Lykke Lise. Det nydelege smykket Love Cup frå Stamped under the moon.

 

 

Så no må eg berre bestemma meg for tekst inni smykket… Om eg kanskje skal gå for namna på alle i vår vesle kjernefamilie… og om vi i så fall er klar for å fastsetta namnet på den komande prinsen… Hmm… i tenkeboksen her… Men tusen takk til Lykke Lise for at eg fekk vera den heldige vinnaren ;-)

 

 

Lagt inn av Randi Kl. 22:13 | 8 kommentarar
Tema: , , | Kategori: Hus & Heim

Sommarens dessert på grillen

fredag 15.juli 2011

Eg forsvann visst inn i feriemodus i ein fei. Vore så herleg! Ikkje året for dei store utskeiingane dette, men herleg å berre ha fri og kunne ta ting i roleg tempo…

Været har vore sånn lett blanding men dei siste dagane har det vore herleg sol! I den anledning tenkte eg at eg skulle dele eit tips om ein enkel dessert på grillen.

 

Varm fruktblanding… Mmmm… nydeleg måte å avslutte eit grillmåltid på!

 

 

Du kan i grunnen bruke det du måtte ha av frukt, her brukte eg eple og druer med litt valnøtter til. Strø over litt sukker (kan droppast om du vil) og ein god dose kanel.

 

 

Dette pakkes i folie og legges på grillen.

 

 

Servers rett frå grillen, med ein dose god iskrem ved sidan av.

Mmm… er berre så enkelt og godt! Ei anna blanding som også er veldig god er eple og banan, med hakka mandlar og eit lett dryss kokos, sukker og kanel.

 

Åååå..håper det vert mange fleire grilldagar framover :-)

 

Lagt inn av Randi Kl. 09:27 | 9 kommentarar
Tema: , , | Kategori: Oppskrifter / Mat

København

søndag 19.juni 2011

Vel tilbake frå ein fin tur til København. Vi var stort sett heldig med været, for min del var det i alle fall til tider rikelig varmt… Kjenner nok på at eg ikkje har bruk for noko tropevarme akkurat denne sommaren… ;-)

Sjølv om det var ein jobbtur var det lagt opp til litt sosialt program også.

 

Mellom anna fekk vi ein guida tur til Carlsberg Bryggeri

 

 

 

Må innrømma at eg vart positivt overraska over kor interessant det var å høyra på historia rundt bryggjeriet… Dyktig guide som fortalde. Så sjølv om eg ikkje kunne ta del i alle smaksprøvane som vi fekk til lunchen her, så var det absolutt verdt turen.

 

 

Litt kultur fekk vi også tid til, ein rask runde gjennom Glypoteket – eit internasjonalt kunstmuseum

 

 

Der var mellom anna masser av flotte skulpturar. Men…må nok innrømma at det var litt for varmt til å gå rundt der inne for lenge… Aircondition er dei tydeligvis ikkje noko flink til i Danmark…

 

 

Då var det friskare med ein båttur :-) Ein times kanaltur med engasjert og dyktig guide – det kan eg anbefala.

 

 

Så då fekk eg eit lite glimt av Den Lille Havfrue også. Må jo liksom få den med når ein er i København…

Og naturlegvis, god mat… her representert med ein nydeleg forrett på restaurant Brewpub

 

Ravioli med rilette af and

 

Var verkeleg godt! Men, det eg jo burde tatt bilete av var desserten, Dobbel Chokolademousse. Det var rett og slett den beste sjokolademoussen eg nokon gang har smaka… Smelta på tunga… Himmelsk… Så er du innom her ein gang, så kan den anbefalast på det aller sterkaste!

Programmet var tett, så shopping vart det dessverre ikkje tid til… eller kanskje det var like greitt… tenker det vert nok baby-shopping på meg framover sommaren uansett… ;-)

 

Denne helga har vore roleg og avslappande – har prøvd å halde beina høgt og stressnivået lavt… For det er klart, kjenner jo at ein vert litt meir sliten av ein sånn tur no enn til vanleg…

No er eg klar for ei siste arbeidsveke – så er det ferie! Herleg :-D

 

Ha ei fine ny sommarveke!
♥

Lagt inn av Randi Kl. 20:59 | 5 kommentarar
Tema: , , | Kategori: Foto – utstyr & bilete

Babytøy

tirsdag 14.juni 2011

Det finnes SÅ masse herleg babytøy! Kunsten blir nok å ikkje gå heilt vill og kjøpa alt for masse. Men, har på følelsen at det ikkje kjem til å bli lett å unngå… ;-)

Var i Haag for nokre veker sidan, og då vart desse her to med heim att

 

 

 

Kjekt med sånne som er litt  spesielle og som ikkje alle andre har også… Og så måtte han jo få eit minne frå sin første utanlands tur… ;-)

Og i helga fekk vi desse to herlege her frå mine foreldre

 

 

 

Var dei ikkje skjøne vel…? Herlege med sånne artige tekster på :-)

Og i morgon fer eg til København ein liten tur med jobben. Så då kan det jo vere han må få seg eit minne derifrå også… ;-)

 

Vanskeleg å vete kor masse ein treng av sånt synest eg. Kanskje nokon av dykk der ute med litt erfaring på området har nokre gode råd å koma med? Kor masse babytøy bør ein ha i ein «startpakke»…? Alle gode tips mottas med takk :-D

 

No håper eg på litt sol og sommar i København, blir nok den siste utanlandsturen min på ei stund reknar eg med… Så kryssar fingrane for nokre fine sommardagar der så ”ses” vi att til helga… :-D

Lagt inn av Randi Kl. 18:36 | 9 kommentarar
Tema: | Kategori: Ymse

Nye puter

lørdag 11.juni 2011

Har leika meg litt meir med symaskina. Så no har den raude sofaen i stova fått selskap av eit par nye puter.

 

 

Svart/kvit rutete stoff på eine sida og heilsvart på andre sida. Stoffet stammar frå den bunken eg fekk frå Mamma i fjor

 

 

Synest desse passa godt i den raude sofaen. Litt kontrastar. Har enno litt att av dette stoffet så kanskje det vert eit par puter til… Kanskje med rutete stoff på begge sider neste gang… eller kvitt på eine sida… Hmm…

 

 

Det rutete stoffet er litt sånn små psykedelisk å sjå på, men eg likar det.

 

Og så har eg sydd i min første glidelås :-D

 

 

Vart i grunnen veldig fornøgd og synest eg fekk det ganske så bra til. Eg fann ei oppskrift på bloggen Design Sponge som var ganske lett å følgja og som gav eit pent resultat. Vil du også sjå finn du oppskrifta HER. 

 

Og med det tipset ønskjer eg dykk alle ei
riktig god helg!


Lagt inn av Randi Kl. 12:48 | Ein kommentar
Tema: , , , | Kategori: Hobby / Handarbeid, Hus & Heim

Krabbeteppe

søndag 5.juni 2011

Då var det visst plutseleg gått ein heil månad sidan sist… Restenergien etter endt arbeidsdag har gått med til andre ting enn bloggen i det siste. Formen er framleis fin, men begynne jo så smått å merka at eg blir større… ;-)

Noko av det eg har fått gjort sidan sist er å ferdigstilla det sy-prosjektet eg nemnte. Og resultatet ser de her:

 

 

Eit stort og godt krabbeteppe til småen. Mitt første store sy-prosjekt dette, så i grunnen ganske så fornøgd med meg sjølv her :-D Synest det vart sånn passeleg tøft og guttette.

 

 

Lappeteppet er laga av lappar frå diverse utgåtte dongeribukser, skikkeleg gjenbruk ;-) Så har eg spedd på med nokre lappar av andre stoff for å få litt meir farge og liv i teppet.

 

 

På nokre av lappane er det lommer som vi kanskje kan gøyma noko lurt i etterkvar som han vert meir nyfiken… ;-)

 

 

På baksida har eg brukt einsfarga fleece-stoff, for litt ekstra varme. Og som fyll inni har eg lagt ei sommardyne. Så håper dette skal bli godt for vesle prinsen å ligga å leika på med tida :-D

 

Masse å ordna å få på plass framover mot september. Men vi koser oss og har ikkje kome stressmodus enno i alle fall… :-)

Og no skal eg prøva å ikkje la det gå ein heil månad til neste gang eg er innom her…. ;-)

Lagt inn av Randi Kl. 21:13 | 12 kommentarar
Tema: , , , | Kategori: Hobby / Handarbeid

Min gamle spilledåse

torsdag 5.mai 2011

Tusen takk for alle gode helsingar og gratulasjonar etter forrige innlegg!  Så koseleg å lese alle som ein :-)

Eg har vore veldig heldig så langt, formen har vore fin heile vegen. Det eg har merka det mest på har vore at eg har vore trøtt og ikkje orka så masse som før. Det er nok grunnen til at det har vore litt stille her på bloggen hjå meg så langt i år.

 

 

Når eg var heime hjå mine foreldre sist helg, var eg å leita litt på gamle pikerommet mitt. Og der fann eg min gamle spilledåse. Så artig, både melodien og den jamne duringa i bakgrunnen var akkurat som eg huska den :-D

 

 

Denne har eg lytta til mang ein gang. Og no skal den få koma fram att og forhåpentlegvis gleda vesleprinsen også.

 

Og så har eg funne fram symaskina igjen… og her er ein liten smakebit av pågåande prosjekt

 

 

Nokon som kan klare å gjette på kva dette skal bli…? :-D

 

Ønskjer dykk alle ein super dag!

Lagt inn av Randi Kl. 07:47 | 10 kommentarar
Tema: , , | Kategori: Ymse

You make me smile

fredag 29.april 2011

 

Eg har lova dykk ein liten hemmelighet… og no er det på tide å røpa den… ;-)

 

 

Det er nemlig ein liten krabat som får oss til å smile – og han er venta i september :-D

Vi gleder oss stort! Endeleg skal vår vesle familie på to verta utvida med eit medlem til.

 

 

Dei første innkjøpa er så smått i gang, eg fall sånn for desse to plagga at eg klarte ikkje la vera å ta dei med heim – så små og skjønne! Gleder meg sånn til å få sjå desse på vesle prinsen.

Så no går vi spanande tider i møte. Vi er takknemlige, forventningsfulle og veldig veldig lykkelige!

 

♥ ♥ ♥

 

Fredag, solskin og grillen er snart klar – kan det bli betre?

Ønskjer dykk alle ei fantastisk herleg helg!

 

Lagt inn av Randi Kl. 16:56 | 16 kommentarar
Tema: | Kategori: Ymse

Påskebakst

torsdag 21.april 2011

Då har påskefreden senka seg hjå oss også. Skal bli utruleg godt med nokre ekstra dagar fri! Været skal visst ikkje verta så aller verst heller, litt grått her i dag men mildt og fint.

Starta ferien med å fylla litt opp i frysaren. Er så godt ha litt enkel bakst på lur der. Så laga først ein liten :-) bolledeig.

 

 

Heva seg utruleg fint denne ;-) Og av denne vart det då 32 herlege skulebollar.

 

 

I tillegg prøvde eg meg på noko som heiter lettvinte wienerbrød. Genialt enkelt å lage og smake herleg.

 

 

Dei seig litt utover og vart litt tynne synest eg, så må prøve å få litt meir høgde på dei neste gang… for desse skal eg absolutt prøva igjen. Skjøner godt kvifor dei har fått det namnet dei har ;-)

 

Elles er det nok framleis litt stille her hjå meg på bloggen, men eg har ikkje forsvunne heilt… og etter påske har eg ein liten hemmelighet å dela med dykk ;-)

 

 

Ønskjer dykk alle ei strålande flott påske!

Lagt inn av Randi Kl. 16:34 | 5 kommentarar
Tema: , | Kategori: Oppskrifter / Mat
 
  Eldre innlegg »